Miyerkules, Abril 15, 2015

Hindi Kita Boyfriend Pero...

Hindi kita boyfriend pero tuwing umaga gusto ko na ako ang unang babati sa'yo ng "Magandang Umaga".

Hindi kita boyfriend pero gusto kitang makita araw-araw kahit saglit lang.

Hindi kita boyfriend pero sa tingin mo pa lang kinikilig na agad ako, paano pa kaya kung ngumiti ka na, siguradong tunaw na ang puso ko.

Hindi kita boyfriend pero nagpapaganda ako para sa'yo. Para kahit tumingin ka sa iba, ako lang ang tititigan mo.

Hindi kita boyfriend pero sobrang masaya ako sa simpleng biruan natin, paano pa kaya kung magkwentuhan pa tayo tungkol sa buong maghapon.

Hindi kita boyfriend pero nakikita ko ang hinaharap kasama ka.

Hindi kita boyfriend pero sabay tayong umaasa sa mga pangarap kahit gaano ito kahirap abutin, at sabay tayong bumabangon sa bawat pagkabigo.

Hindi kita boyfriend pero alam natin na lagi tayong nakahandang dumamay sa isa't isa.

Hindi kita boyfriend pero sabay tayong umiyak, tumawa, tumalon at panandaliang mabaliw sa panloloko ng tadhana.

Hindi kita boyfriend, pero sana nga boyfriend na lang kita.

Hindi Kita Gusto Dahil...

Hindi kita gusto dahil sa kulay ng balat mo

Hindi kita gusto kasi hindi mo taglay ang mga matang sing kinang ng mga bituin. Hindi ko tuloy masilip kung ano ang nasa kalooban mo.

Hindi kita gusto dahil hindi ka kasing tangkad ni James Yap.

Hindi kita gusto dahil wala sa'yo ang ilong na tulad ng kay Ryan Agoncillo.

Hindi kita gusto dahil masyado kang mabait. Hindi ko tuloy mawari kung paano ka magalit.

Hindi kita gusto dahil hilig mo rin ang mga kantang pinakikinggan ko.

Hindi kita gusto dahil natatandaan mo nang minsang sabihin kong ayoko ng honey glaze chicken sa Jollibee, kahit na hindi ko pa naman talaga ito natitikman.

Hindi kita gusto dahil gusto mo ring mapalapit sa mga taong mahalaga sa'kin.

Hindi kita gusto dahil masaya ako kapag kasama kita. Halos hindi ko napapansin ang oras. 

Hindi kita gusto dahil tinuruan mo ako kung paano magtiwalang muli.

Hindi kita gusto dahil pinaniwala mo ako na mayroong mga natatanging nilalang na katulad mo.

Hindi kita gusto dahil unti-unti na kitang minamahal.