Pluma(mula sa aking tumblr)

Noong high school ako, isa sa mga paborito kong basahing libro ay ang mga akda ng manunulat na si Bob Ong. Hinahangaan ko ang kanyang mga simple at nakakatawang kwento ngunit may mga malalim na kahulugan. Minsan ring sumagi sa isipan ko ang minsa'y makapagsulat ng mga ganoong akda. Mga akda na mangungulit sa nananahimik na isipan ng mga mambabasa. Mga akda na kahit papaano'y may maiiwang katiting na butil ng karunungan lalo na sa mga taong inilalaan ang kanilang oras sa mga walang kabuluhang bagay. Kaya't naging isa na sa aking misyon na hikayatin ang aking mga kakilala na kahit papano'y magkaroon man lang ng kahit isang paboritong libro. ito na marahil rin ang dahilan kung bakit isa sa mga paborito ko si Bob Ong dahil ang kanyang mga akda ay madaling maintindihan at kagiliwan ng mga simpleng mamayan.
Kahapon ay nagtungo ako sa isang book launch sa Robinsons Galleria. Nakakahiya mang aminin, iyon ang unang pagkakataon na nailapat ko ang aking mga paa sa lugar na iyon. Kasama ang ilan sa aking mga kamag-aral, naatasan kaming i-dokumentaryo ang gaganaping event. Tuwang-tuwa ako dahil siyam na manunulat sa Filipino ang dumalo. Ang mga akda nila ay inililimbag ng Anvil Publishing Inc. Nakakamangha ang kani-kanilang istilo ng pagsulat at pagsasalita. Nakakatuwa rin ang mga kwento sa likod ng kanilang mga obra maestra. Mahihinuha mo na ang mga manunulat ay mayroong malalalim na personalidad.
Isa sa mga umagaw ng aking atensyon ay si Ginoong Tony Perez. Isinulat niya ang aklat na may pamagat na "Si Crispin". Dito ay binigyan niya ng panibagong buhay si Crispin, na kung matatandaan natin ay namatay sa aklat na Noli Me Tangre. Mayroon siyang kakaibang karakter. Natuwa ako nang makita ko ang kanyang pluma na ginagamit sa pagpirma sa mga libro. Bukod pa dito, dumating rin sa event si Ginoong Isagani Cruz. Hindi ako makapaniwala na nakita ko siya ng personal na dati'y sa papel ko lamang nababasa ang pangalan niya.
Tunay na hindi pa rin pahuhuli ang mga manunulat na pilipino, marami mang mga bagong akdang banyaga ang mailimbag, higit na maganda pa rin ang sariling atin. Nagkaroon tuloy ako ng inspirasyon na palawakin pa ang aking kaalaman sa pagsusulat at makapaglimbag ng aking sariling obra maestra pagdating ng panahon.